नमस्कार शेतकरी बांधवांनो! राज्य शासनाने अतिवृष्टीमुळे नुकसान झालेल्या शेतकऱ्यांसाठी मोठा निर्णय घेतला आहे. या निर्णयामध्ये कोणते जिल्हे पात्र आहेत, नुकसान भरपाई किती आहे, आणि पैसे कसे मिळतील याबाबत सविस्तर माहिती मिळणार आहे. चला, या निर्णयाचे महत्त्वाचे मुद्दे समजून घेऊया.
शासन निर्णयाचा हेतू
जून ते ऑक्टोबर 2024 दरम्यान, महाराष्ट्रातील विविध जिल्ह्यांमध्ये झालेल्या अतिवृष्टी आणि पुरामुळे शेतकऱ्यांच्या शेतीचे मोठ्या प्रमाणात नुकसान झाले. या नुकसानीची भरपाई करण्यासाठी राज्य शासनाने महसूल व वन विभागांतर्गत 10 सप्टेंबर 2024 रोजी शासन निर्णय घेतला. या निर्णयानुसार, एकूण 2920 कोटी 57 लाख 50 हजार रुपयांचा निधी मंजूर करण्यात आला आहे
या निधीतून नुकसान झालेल्या शेतकऱ्यांना थेट त्यांच्या बँक खात्यात पैसे जमा केले जातील. डीबीटी (Direct Benefit Transfer) पोर्टलद्वारे लाभार्थ्यांच्या खात्यात हा निधी वर्ग केला जाणार आहे. शेतकऱ्यांचे बँक खाते डीबीटीसह लिंक असणे गरजेचे आहे.
कोणते जिल्हे पात्र ठरले आहेत?
राज्यातील विविध विभागांतील जिल्ह्यांची यादी जाहीर करण्यात आली आहे. यामध्ये जालना, हिंगोली, नांदेड, बीड, धाराशिव, छत्रपती संभाजीनगर, परभणी या जिल्ह्यांचा समावेश आहे. याशिवाय नागपूर विभागातील वर्धा, नागपूर, गोंदिया, भंडारा, गडचिरोली, चंद्रपूर हे जिल्हे देखील या यादीत आहेत. पुणे विभागातील सातारा, सोलापूर, सांगली, नाशिक विभागातील नाशिक, धुळे, नंदुरबार, जळगाव यांचाही यात समावेश आहे.
नुकसानभरपाईसाठी संबंधित कालावधी ठरवण्यात आला आहे. अतिवृष्टीमुळे नुकसान झालेल्या हंगामाचा विचार करून जून 2024 ते ऑक्टोबर 2024 हा कालावधी निश्चित करण्यात आला आहे. या कालावधीत प्रत्येक जिल्ह्याच्या नुकसानीचा अंदाज घेऊन निधी वितरित केला जाणार आहे.
नुकसान भरपाईची रक्कम कशी ठरवली?
प्रत्येक जिल्ह्यातील बाधित हेक्टरचे प्रमाण, बाधित शेतकऱ्यांची संख्या, आणि नुकसानीचा अंदाज लक्षात घेऊन निधीचे वाटप करण्यात येईल. उदाहरणार्थ, नागपूर विभागातील नागपूर, वर्धा, गोंदिया, भंडारा जिल्ह्यांमध्ये ठरावीक कालावधीत झालेल्या नुकसानीसाठी निधी वितरित केला जाणार आहे.